今屆香港小姐已於上月誕生，而韓國同樣都會舉行選美大賽，唔止會一年一度選出韓國小姐，亦會舉行「南韓國際先生」（Mister International Korea）嘅比賽，勝出者亦可以化表韓國參加「世界美男大會」(Mister International)，而去屆首位亞裔「國際先生」冠軍李承煥更曾經來港吸金。

新一年嘅「南韓國際先生」比賽共有27名參賽者，官方Instagram之前上載咗27人除晒上衣騷肌嘅相，睇到唔少網民都心心眼。比賽於日前完滿結束，現年29歲嘅黃大雄(音譯，Hwang Dae Woong)就成功贏得冠軍，將代表韓國再出去比賽。

身高180cm嘅黃大雄本身係一名消防員，而且亦好鍾意喺Instagram上載生活照，粗眉大眼、五官深邃，冇表情時看似好嚴肅，但笑起上嚟就有幾分可愛，唔少網民大讚「高顏值」。至於黃大雄接受雜誌訪問時，曾表示：「消防員係一份會消耗許多體力與感情嘅工作，事實上好多消防員都因為患創傷後壓力症候群，需要接受心理諮詢，所以身為消防員就要有緩解壓力嘅方法，我個人嚟講，做運動、流汗就係減壓嘅方法。」難怪身材咁好。

更多韓流，喺晒《娛果》
http://fb.com/appledailyent