喺韓國收費台tvN及香港Viu app熱播、由李民基及庭沼珉主演嘅韓劇《今生是第一次》，劇集噚晚迎來第16集大結局，承接上一集，講到男主角世熙（李民基飾）同女主角志浩（庭沼珉飾）因住屋問題而合約結婚，雖然兩人都喜歡對方，但庭沼珉有感李民基從來冇向自己表露自己嘅心意同情緒，所以就向李民基提出終止結婚合約要求，並搬離兩人嘅寓所。

兩人分開數個月，李民基以為庭沼珉去咗蒙古旅行，點知庭沼珉原來一直喺韓國，庭沼珉仲決定向李民基表白，兩人陰差陽錯下去齊齊去咗好友間屋塔房住，當庭沼珉發現李民基喺屋內就十分感觸，並向李民基表達愛意，李民基以為發夢，到第二日先知庭沼珉原來一直喺韓國，李民基第一次喺庭沼珉面前發脾氣，兩人和好並展開真正結婚生活。

而噚晚一集中，李民基同庭沼珉多次咀嘴，仲上演床戲，劇中飾演庭沼珉好朋友嘅李絮同金佳恩亦喺劇中有大團圓結局，而劇集噚晚大結局收視亦創新高，有4.931%，成為開播以來最高一集嘅收視。

另外免費台方面，由鄭麗媛同尹賢旻主演嘅KBS新劇《魔女的法庭》噚晚亦大結局，同樣大團圓，收視亦創新高，錄得14.3%收視，再次蟬聯同檔收視冠軍。而同檔由尹鈞相及鄭惠成主演嘅新劇《疑問的一勝》噚晚播出第3及第4集，收視有4.5%及4.9%，排同檔第二位；趙正錫同惠利主演嘅《雙面警察》噚晚播出第3及第4集，收視亦有3.3%及3.6%，包尾墊底。

更多韓流，喺晒《娛果》
http://fb.com/appledailyent