帕布唔聲唔聲，嚇你一驚，八方噚日聽到可能改掛八號風球都好意外，個颱風唔係已經走咗咩？點解又返轉頭呀！天有不測之風雲，估得咁準，天文台就唔使成日俾人鬧啦。今次天文台早響會掛八號波，提醒市民個風打到嚟，多個部門即時採取應變措施，食環署更加唔敢怠慢，即刻出動。
食環署咁緊張，事關舊年派比安襲港，尖沙嘴天星碼頭刮起怪風，連垃圾桶都吹得郁，有個女人仲慘被垃圾桶K.O.，呢段垃圾桶K.O.女人片段，成為廣大市民控訴天文台唔掛八號風球最有力證據。煲呔政府以民為本，點可以容忍再有市民俾垃圾桶K.O.醜事發生？連一個垃圾桶都搞唔掂，口口聲聲強政勵治嘅特首顏面何存？

肥馬留辦公室唔敢走

八方相信負責掃街嘅食環署都「收到風」，所以噚日見天有異象，立即派人去碼頭巡視，該署油尖區環境衞生辦事處高級衞生督察趙景豪同八方講，工作人員會視乎情況，將街上垃圾桶用繩綁實或者暫時搬走。八方冒雨去到尖沙嘴碼頭案發現場，見到啲垃圾桶果然已經被綁到實一實，紋風不動，除非有龍捲風，否則應該唔會再發生K.O.路人事件。
除咗食環署官員，噚日仲有一個官員好忙碌，就係商務及經濟發展局局長馬時亨，事關佢轄下部門包括天文台同電訊管理局，仲有不斷發放颱風資訊嘅香港電台。下屬要當值「風更」，局長怕且都唔係幾好意思安坐家中。佢噚日下晝原訂參觀生產力促進局，之後同記者見面，八號波一起所有行程取消，佢留喺辦公室直到傍晚，以防有乜突發事件可以主持大局。
噚日下晝手提電話網絡大塞車，呢啲情況喺大時大節同惡劣天氣都會出現，電管局好快就呼籲市民稍安毋躁，唔使肥馬出手，至於天文台今次都冇乜差池，市面大混亂入唔到台長數，而且監測天氣呢啲專業工作都係留番畀科學家做好啲，肥馬安然度過咗上任後第一個八號風球。
有官場中人講笑話，可能肥馬身形夠份量，所以八號波都頂得住，不過歸心似箭嘅打工仔被公共交通玩到殘，運輸署個緊急事故交通協調中心實俾市民鬧到飛起，星期一上班日，運輸及房屋局局長鄭汝樺隨時俾人插到變箭豬。