日本富士電視台邀得收視女王松嶋菜菜子出山拍攝7月新劇《營業部長吉良奈津子》，今次係菜菜子繼《救命病棟24時第5季》之後，相隔3年再拍連續劇。

菜菜子飾演嘅女主角吉良奈津子，係一名兼顧家庭同事業嘅40幾歲女子，劇中講佢差不多40歲先至結婚生仔，離開職場3年，當佢返回工作崗位後，發現公司業績惡化換咗另一批員工，佢要由創作部被調職往營業部，面對事業同家庭同步入危機，菜菜子飾演一個事業型女性絕對有咁上下睇頭。

菜菜子主演嘅《家政婦三田》大結局曾創下40%收視，今次新劇拍檔有松田龍平同埋DAIGO，近年日劇界離唔開不倫同埋床戲呢兩項賣點，有傳媒爆料指，菜菜子今次新劇都不容有失，會交代佢同劇中丈夫原田泰造婚姻觸礁，繼而情傾扮演下屬嘅松田龍平，到時仲會發展到床上關係，可算係菜菜子嘅一個新挑戰，雖然未知意識上有幾大膽，但就有人擔心佢會步福山雅治後塵，包到冚演出床戲反而帶來反效果。