新地(016)最新年報出爐,華華最關心係董事嘅薪酬有冇大變,舊年經濟環境唔好,大家減少少人工在所難免,奇就奇在,明年一月退休嘅執行董事黃奕鑑,竟然被減人工30%,總薪酬941萬元,喺7名執董入面減幅最大。前年黃奕鑑喺董事局入面人工第二高,但係舊年已跌落第三,俾另一位執董陳鉅源爬過咗,陳生舊年年薪1025萬元;而最高薪仲係執董黃植榮,舊年薪酬1384萬。
黃奕鑑總薪酬大減,因酌情花紅減咗73%,由前年921萬元減到得252萬元。老闆郭氏兄弟喺佢臨走前先至狂減佢人工,唔知佢哋之間係咪有芥蒂呢?
其實新地今年中宣佈黃生退休都嚟得有啲突然,黃生喺新地做咗28年,話晒係兩朝元老,話就話退休,但實情佢今年得57歲,都未到退休年齡;佢當時仲發聲明話,幾年前已經準備退休,希望多啲陪家人。總之,成件事有啲耐人尋味。