現年43歲嘅台灣玉女蘇慧倫本月6號同拍拖兩年嘅44歲滑板代理商人孫益民（Jimmy）註冊，日前兩人就喺日本北海道星野集團TOMAMU度假村之水教堂舉行浪漫婚禮，著上古典露肩婚紗嘅蘇慧倫顯得非常優雅，手上仲戴上閃令令嘅婚戒。

結婚儀式係當晚嘅5點半開始，蘇慧倫同Jimmy喺大約50位親友包括許茹芸夫婦、張震夫婦同導演鈕承澤等見證下舉行溫馨甜蜜婚禮，眾人喺蘇慧倫同Jimmy進場時狂灑鮮花祝賀，氣氛感人。蘇慧倫接受訪問時就話：「在這個重要的日子，我很希望得到宇宙以及大家的愛與祝福，所以特別請朋友為我在手上畫了Henna。」

蘇慧倫話仲未習慣俾人叫做孫太同戴婚戒，又透露老公係喺註冊前兩日先喺屋企求婚，佢打開戒指盒開頭只見到一團粉紅線：「他把線的一端纏在我左手無名指，然後從口袋拿出戒指，從線的另一頭滑到我無名指。」婚禮大約用咗220萬新台幣，親友都係自費出機票觀禮，所以佢哋都冇收禮金，招待賓客三日兩夜嘅食宿，其中Jimmy仲安排滑雪行程。由於佢兩個婚後要住嘅新屋仍然裝修緊，所以兩人喺北海道返台灣後都係分開住直到新屋搞掂為止。講到生細路嘅問題，蘇慧倫就話：「我們在期待這件事，覺得孩子要來自己會來。」