苟芸慧噚晚喺又一城出席活動，着住露膊裝嘅佢風騷露事線業，不過就大意失手，左邊胸嘅Nude Bra邊唔小心走咗出嚟，但亦無損就快成為人妻嘅苟姑娘心情，佢笑言未來老公陸漢洋比佢更緊張：「佢一路跟住我，最近出席長春電影節都有跟埋去。」係咪有咗BB所以特別緊張？佢話：「唔係，因為就快結婚，要完成一件事。」過大禮未？苟姑娘話：「中國傳統好似做咗，聽過佢同父母講，但我唔太清楚呢啲嘢，我覺得只要兩個相愛就OK，中國禮節冇乜所謂。」

至於喜帖就仲未開始派，佢話：「暫時send email畀朋友先，因為驚唔夠時間，之後再補，座位編排老公做，我只需要將姊妹扮到靚靚，同安排當晚活動，我哋兩公婆有Surprise表演環節，我哋準備咗少少嘢，不過相信大家唔想睇我哋，因為我班姊妹好靚女，總共有8個姊妹，其中一個係圈外人，圈中人有王君馨、李亞男、香香、伍姑娘、簡慕華、梁嘉琪、關曉彤，都係《金枝2》嘅朋友，兄弟團都係新郎哥嘅朋友，亦有圈中朋友，佢話唔俾玩新郎，佢好叻識同姊妹搞關係，講明唔使玩，但會派利是畀佢哋，老公畀幾多就唔知啦！」

另外，講到前港姐馮盈盈日前主持大台節目《後生仔傾吓偈》，用港姐嫁個有錢人形容為「公廁」同「做x」嘅一番言論，苟姑娘話：「好多嘢唔知發生咩事，可能係節目效果，不過有啲說話係唔好喺公開場地講，每個人有自己諗法，需要知道喺自己場合講啲乜，點都好，希望佢係冇心。」

精選娛聞，喺晒《娛果》
http://fb.com/appledailyent