韓劇《被告人》40歲男星池晟出名係廿四孝老竇同老公，佢一向係愛妻號，以前老婆李寶英未生B女時，池晟就成日將老婆掛喺口邊，0依家有咗寶貝女，池晟就變成「女兒儍瓜」，而喺Instagram佢亦不時上載寶貝女嘅照片同片段，同粉絲分享。

噚日池晟就上載囡囡喺機場禁區內嘅片段，當時池晟囡囡對周圍嘅事物表現好好奇，由於李寶英現時仍忙於拍攝新劇《悄悄話》，劇集將於本月23號才大結局，所以池晟就趁老婆忙緊工作之際，就帶愛女出遊。

池晟喺Ig上就未有透露會去邊樹遊玩，不過原來此行嘅目的地竟然就係香港，讀者蘇小姐噚日就喺尖沙嘴半島酒店捕獲池晟湊女，蘇小姐更提供照片給本報，根據蘇小姐所講當時佢就正排隊等候到半島食high tea，點知見到戴住黑色口罩嘅池晟抱住女兒坐喺度，由於蘇小姐有睇開韓劇，加上見到池晟喺Ig上載女兒嘅片段中，佢個女手持嘅公仔攬抱枕同半島見到嘅小妹妹一樣，所以就得知面前人就正正係池晟。

蘇小姐指現場只見池晟同女兒兩個人，未見李寶英喺現場。由於冇乜人認得池晟，所以佢都將口罩拉低一半，仲man到爆單手抱住女兒，可見佢相當熟手，平日應該成日做慣全職爸爸湊囡囡。而囡囡似乎瞓緊晏晝覺，所以見佢就咁瞓喺池晟心口上，池晟則講緊電話。及後近傍晚時份，池晟換過件衫兼gel咗頭，同女兒乘車出去，唔知係唔係準備去食晚飯？

不過原來今次池晟係帶埋愛女來港工作，只見佢喺尖沙嘴海傍疑似影緊雜誌相時就被網民捕獲到。

池晟同38歲女星李寶英於2007年公開戀情，並於2013年結婚，寶貝女兒於2015年6月13號出世，由於池晟本名為郭太根，所以女兒嘅名字就叫郭智柔，下個月B女就過兩歲生日。