新世界發展（017）創辦人鄭裕彤（彤叔）上星期仙遊，由於佢一早安排好上市王國嘅接班人，消息對公司股價冇乜影響，新世界股價上月初已經重上10元水平。咁啱得咁蹺，彤叔女婿杜惠愷上星期亦趁高位減持新世界，套現超過9,200萬元。
根據聯交所資料，杜惠愷今年密密增持新世界股票，作價介乎6至8元，持股量由不足1,000萬股，增加到1億股以上，不過新世界咁大間公司，1億股都只係等於1%股權，依然微不足道，應該只係屬於佢個人長線投資啫。

賬面賺2,700萬元

佢都算有耐性同眼光喎，今年喺低位一路增持，等到上月新世界股價重上10元，佢就由22日至28日分批沽貨，共沽900萬股，套現9,235萬元，粗略計佢成本價約7元，賬面賺2,700萬元。而佢仍然持有嘅新世界股票，市值超過10億元。
做得彤叔女婿，今年72歲嘅杜惠愷當然並非等閒之輩。杜惠愷嘅爸爸杜若波早年從上海來港開設豐盛珠寶，跟彤叔老友鬼鬼。杜惠愷喺美國碩士畢業後，同彤叔千金鄭秀霞結婚，之後就加入新世界。佢2013年開始轉做新世界非執行董事，舊年底將做機電工程生意嘅豐盛機電（331）上市，自己有間上市公司在手。

李華華
mailto:[email protected]