當年今日

  發叔開會玩遲到撩火頭 - 李八方

蘋果日報 2002/04/25 00:00


發叔黃宏發前排因為主持立法會的政制事務委員會會議,已經試過因為高官問責制同眾議員開火,噚日立法會一個新組成、專門傾問責制問題的小組委員會開第一次會議,發叔又再次同其他議員劈過,火氣依然十足。
小組委員會噚日一開會就要選主席,發叔聲言自己特登遲到,結果選主席時不在場;到選副主席時,吳亮星好識做咁提名佢,點知佢似乎唔多領情,一口拒絕。
到小組討論要在星期六開公聽會,大家研究緊公聽會的形式時,冷不防發叔突然提醒大家,下個月十一日星期六,議員約了官員踢波!
唔講猶自可,一講呢句踢波就當堂令大家都嚇了一跳,前綫劉慧卿更聽到「頭擰擰」。冇幾耐之後,發叔同劉慧卿真係因為討論開會日期而開火,Emily唔想發叔講番之前已經討論過的日期問題,發叔就話自己只係提意見,反駁話:「我講句都得啩?劉慧卿議員!」
結果難為了小組主席葉國謙出面調停,才不致繼續舌戰。


E-mail:[email protected]