酒精降溫辦法好簡單，只係用一些藥用酒精和水，以1:1比例混合，喺上車前向內櫳噴幾下，氣溫就會降低10℃咁話！原理有點像小時候發燒，阿媽用酒精抹身嘅原理咁，但10℃聽落好誇張，實際如何？去片！

將部車放喺太陽下暴曬一輪，以溫度計一量，嘩！車內溫度高達35℃，唔熱死都焗死！跟手就用預先以1:1開好嘅酒精（可按喜好加減比例）向車櫳噴幾下，之後再拎起溫度計嚟睇，咦？真係降低至27℃，即係10秒內就降咗成8℃，犀利！

中大生物及化學系副教授陳竟明解釋降溫原理，「喺酒精揮發過程，酒精分子會帶走熱能，所以出現溫度下降情況。當水加酒精經由噴壺噴出嚟時，會形成好多細小水點，迅速蒸發嘅同時，亦代表酒精揮發，過程中會耗用車內大量熱能，我哋部車就喺『失熱』嘅情況之下得以降溫喇！」

「酒精始終係易燃物品，若加上燃點物好似火機或壓縮氣罐等，好易會發生危險！」陳教授話都係用番自然方法最好，一上車開晒窗，以對流原理利用自然風帶走車內嘅死風，通風後先開冷氣，咁就又慳又安全，仲好環保㖭！

汽車護理公司市務經理PatLeung：「好多汽車都採用真皮或人造皮，一般都有唔同花紋及顏色，但全是後天壓製而成，「以酒精噴灑車櫳，好易傷害到皮色同花紋，得不償失！」

除咗降溫，夏天另一大問題當然係除臭，炎炎夏日，好多嘢容易發出異味，若親朋好友特別大汗，上到車焗住仲難頂！所以部車不時都要放啲清新除臭物品，大家都舒服啲嘛！

市面上有好多除臭產品，好似殺菌除臭嘅香精噴霧咁，效力一般可以維持一至三個月嘅時間；又或者近年大Hit嘅備長炭產品，一般都話有除臭殺菌嘅功效。好似加有炭嘅冷氣隔塵網、地台除臭膏咁，而且都可以連續用上好幾個月，安然度過炎夏！

唔係部部車都有個雪櫃咁High，想喺夏天Keep住有凍嘢飲，呢款「一罐雪櫃」就啱晒你！可以喺短時間由熱變冷，可惜只限一罐飲品嘅容量，聽講林曉峰都入咗四個，一家大細都有得嘆！
另一個最得我歡心嘅，就係搞鬼太陽能散熱機。裝喺窗邊，只要有太陽，部機就自動運作，就算泊低部車唔着副偈，單靠太陽一樣可以隨風送爽，上番車都無咁熱。

華哥推介：「放喺部車即刻乜臭味都無晒，魚腥味都辟到，而且起碼用到3個月！個個朋友用過都話得！」

汽車用品老闆推介：「好多汽車臭源都係嚟自隔塵網，用含炭隔塵網，可以抗菌除塵兼除臭，有效期半年至一年，好多客都鍾意，尤其係鼻敏感嘅人，個網連花粉都隔到咁就唔使驚啦！」

（a）台日汽車用品（23924244）
（b）JCShop（31022783）

我咁懶，寧願開窗兜生風好過。

正呀，酒精味感覺上好亁淨！

我驚會整傷我啲靚皮椅。

噴幾下就得，簡單又清涼。

我架車嘅冷氣超勁，唔使咁煩。