消費blog:紅米黑米「甩色」唔使驚

蘋果日報 2008/01/20 00:00


「我要纖體、要靚呀!」公司有同事就結婚搵我幫手(佢唔准我講,邊個自己估),又睇咗《穿Prada的惡魔》編劇嘅新戲《27宜嫁》,講做咗27次伴娘嘅恨嫁OL……可想而知我就嚟做伴娘嘅心情。
終於學同事筍魚食「雀粟」,即係用紅米、黑米等煮成嘅飯仔,夠健康。但洗米同煮飯時發現,啲水竟然染成又紅又黑!甩色?唔通米都有假?
消委會個friend叫我唔使太驚慌,有色稻米嘅色澤來自「花青素」,就算紫藍色、紅色嘅櫻桃、葡萄、黑加侖子、蘋果都有。花青素具抗氧化功能,有助預防心血管疾病,仲可以清除嚟自壓力同吸煙、會破壞身體平衡嘅自由基。
佢話,花青素屬水溶性,其中紅米冇咁易溶喺水,除非浸六、七個鐘至會有少少橙紅色;但黑米容易啲,啲水會變紫紅色或棕紅色,但只有用墨汁染嘅假黑米,啲水先會呈墨色。佢又話,食物安全中心04年1月至07年9月抽查市面160個米類樣本,都冇發現有染色問題。靚嘅紅米、黑米都會有淡淡米香。諗諗吓都係唔食嘞,點解?其實好多結得婚嘅女人都未必靚,只係好命之嘛。
逢周一至周四刊出