【新增內容及圖片】
韓劇《太陽的後裔》男星宋仲基去年10月跟宋慧喬結婚後，就一直忙於新婚生活，不過oppa今日就舉行出道十週年紀念粉絲見面會，現身近距離親近粉絲。

宋仲基今日韓國時間下午四時，於首爾慶熙大學平和殿堂舉行見面會，今次係oppa婚後首次於韓國舉行粉絲見面活動，大批粉絲一早就到現場等見oppa。活動正式開始前，場內就播出宋仲基好友拍攝嘅打氣短片，當中包括朴寶劍、車太鉉、金智媛等人，當中要車太鉉用五個字向宋仲基留言時，車太鉉就搞笑地表示：「宋慧喬萬歲！」金鐘國亦於短片中提到喬妹，爆料喬妹帶宋仲基去健身房。

隨後宋仲基以全黑嘅西裝打扮、戴住婚戒現身，一現身oppa就已經感動到喊，表示：「好感謝大家今日嚟。」主持為oppa送上十週年嘅紀念獎盃，oppa錫咗獎盃一啖，之後又高舉獎盃。另外大會又準備咗蛋糕及鮮花，oppa之後就手拎一束花行近台邊，再次跟粉絲表示：「多謝。」台下即不停尖叫。

之後宋仲基於台上跟粉絲回顧過去拍攝嘅作品，當講到韓片《狼少年之戀》時，大會就播出當時oppa穿韓服及化妝嘅劇照，oppa睇番即尷尬地笑。大會又播出oppa曾大跳《Hot Issue》嘅短片，宋仲基立即蹲喺地上掩面，不過之後佢都有郁幾下，跟住跳。而於問答環節中，其中一題係要oppa估《太陽的後裔》中劉時鎮嘅軍牌號碼，不過oppa就答錯，而oppa答緊呢條問題時，就驚喜落台行入粉絲堆。

見面會上，宋仲基亦有開金口唱歌，中場休息之後，oppa就換上白色衫再現身。除咗邀請粉絲上台外，宋仲基好友李光洙今日亦有現身撐場，更於台上爆料指宋仲基飲完酒之後會跳舞。問到宋仲基最想從光洙身上去掉嘅三個缺點時，宋仲基就搞笑地回答：「身高、身高、身高。」之後表示想跟光洙一齊主持電台。

除咗光洙外，《太陽的後裔》男星金敏碩、2PM嘅俊昊等人都有現身。

更多韓流，喺晒《娛果》
http://fb.com/appledailyent