講到明自己心繫祖國，完完全全唔想、唔希望、唔願意被刊登於香港娛樂版嘅溫兆倫，對唔住，又要操勞你，要現一現身。

早前溫兆倫貼了一張父親舊照，並說:「爸，真沒想到你走了十幾年後火了，大家說我爸跟杜文（汶）澤哥哥長得很像，難道我爸當年他跟……哈哈！」溫父戴上粗框眼鏡加上國字面形及眼細細，確實同杜汶澤如同失散父子。

溫兆倫早前自詡97年之前係一個無家無國，直至97年香港「回歸」中國之後，令自己終於可以「很驕傲地說：我的國家中國，我是一個有血有肉的中國人！不管你們如何批評我都改變不了我愛祖國的心！」好多香港90後而言，根本沒多少人認識邊個係溫兆倫；反而你講「丁有康」，可能會有點印象。丁有康有沒有家，對香港人而言可能感覺不大，但對內地網民而言，又唔係咁講。

已轉戰內地搵人仔，口口聲聲愛國嘅溫兆倫，日前於微博還擊一眾批評其熱血愛國心嘅網民，更表明:「這兩天辛苦幾位同事把在我微博中發表和轉發了超過五百次不良內容的博文，IP地址送交有關部門按祖國的法律去處理，有些還差幾條才過500條轉發的我希望你們不要達標因為後果你們都比我清楚！」原來其微博已變成「愛國園地」，容不下相反意見？一相反就等同反了？

還好溫兆倫已回歸「祖國」了，原因不言而喻。有網民留言謂:「舉報IP?專業五毛也不敢幹得事，也做的出來」。就連溫兆倫自己都話似足溫父嘅杜汶澤，都忍唔住回敬咗佢:「三個字，x樣！」

唔好意思，個「x」字唔出得。