五十六歲的郭偉雄，是「電器贈長者」計劃的唯一一位持客貨車牌照的司機，既出車又出力的義工，他妙語連珠表示：「我做嘅服務係『迎送生涯』，先揸車同其他義工去收善長捐出嘅電器，然後將電器送上門畀啲窮苦老人，前排大熱天時嗰陣，試過要上落五層唐樓收個雙門雪櫃，做到大汗叠細汗都無計。」
郭偉雄送貨百宗
在郭偉雄「經手」處理的電器轉贈長者個案，連月來合共超過一百宗。健談的他告訴記者：「我同另外兩、三位義工，通常喺星期六、日出動，每次盡量將架貨Van載滿電器，然後一日之內起碼可以去八個老人屋企，將啲電器送畀佢哋。」
郭偉雄有感而發說：「我接觸過一位婆婆，佢要用個執番嚟嘅破爛櫃，擺放我哋轉送畀佢嘅電視。事實上，好多長者屋企冇基本電器用，有得用嘅床、枱櫈、雜物櫃等，多數都係執番嚟嘅殘舊物資。所以我哋每次轉送啲又新淨又耐用嘅電器畀長者，見幫到佢哋又有意義，就覺得辛苦啲搬搬抬抬都值得嘅。」