94歲嘅「Marvel之父」史丹李（Stan Lee）早前展開亞洲行，決心把Marvel文化進一步發揚光大。Stan Lee喺去年12月曾經來到香港，佢仲主動約「宇宙G.E.M.」鄧紫棋見面，原來目的係要研究即將加入Marvel世界嘅中國女性超級英雄，一度令人懷疑G.E.M.有機會加入Marvel行列。

本報收到消息，Stan Lee呢一連串計劃先會以漫畫形式在年底啟動，仲唔止得一個華人超級英雄登場，除咗G.E.M.有機會同Stan Lee合作外，據知香港青年女鋼琴家黃子芳（Catherine）都係熱門人選之一。事實上，黃子芳一早已被Marvel睇中，大陸博米動漫總經理劉陽日前受訪，表示博米會跟Stan Lee嘅工作室落實製作中國首個原創嘅Marvel系列，目前已拍板嘅有「冰雪超級英雄」，黃子芳就會以大使身份擔任呢個系列嘅音樂總監，佢即將前往美國同Stan Lee見面，劉陽仲話日後更會炮製以足球及籃球作主題嘅超英角色。

黃子芳係個百份百香港人，佢中學時代已輟學鑽研琴技，花了十年時間打開其國際鋼琴之路，黃子芳已獲得多項國際榮譽，佢更以鋼琴彈奏嘅《梁祝》為人賞識，成為世界首位獲得英國皇室頒發「英中音樂大使」榮譽嘅華人代表，早前仲親身飛到英國領獎。

精選娛聞，喺晒《娛果》
http://fb.com/appledailyent