公務員事務局局長俞宗怡做官36年，噚日面對仕途最重大政治衝擊，不過對政府而言，立法會公開調查梁展文報告，卻係喜上加喜，好得不能再好嘅大喜日子，皆因全城焦點盡在俞宗怡、梁展文同鄭家純身上，其他涉及政府負面消息就可以輕易淡化處理，最叻走精面嘅政制及內地事務局局長林D9，唔遲唔早，選擇昨日公佈2012年立法會選舉同特首選舉修訂條例草案。

公佈兩選舉草案

呢兩條草案關於後年兩個重要選舉安排，前者包括超級區議員提名門檻，後者則涉及特首小圈子選舉細節，關乎全港市民利益，影響重大而且甚具爭議性，行會噚日通過，政府不動聲色冇即時公開，亦唔等多一、兩日才宣佈，偏偏選擇昨日出台，目的為何，八方相信官府心知肚明。
林D9噚日開記者會公佈草案內容時，陰陰嘴笑住向在場記者講，知道記者要做梁展文報告單新聞好忙。既然知道記者忙於「招呼」梁展文等人，林D9仍然選擇噚日推出草案，顯然係想淡化輿論針對草案嘅批評，如此縮骨做法，真係呢個政府、呢種官員先做得出。

工聯會支持申亞

記者報道新聞係份內事，政府如此縮骨、屈機，擺明車馬剝削市民知情權，納稅人年年交稅畀高官出糧為乜呢？就係欣賞高官做啲咁嘅嘢？上行下效，見到政府帶頭縮骨，工聯會噚日亦博大霧宣佈支持申亞，四個工聯會議員同政府講掂數，談好交換政治利益條件，就支持政府浪費幾百億元搞面子工程。
政府慣用「揦鮓招」避開輿論批評，今年8月13日政府同時公佈四大敏感議題，包括新一輪打擊炒樓措施、副局長及政治助理薪酬檢討、港台顧問委員會成員名單，以及廣管局對商台播出政治廣告的終極裁決，結果大部份傳媒集中報道打擊炒樓措施，其餘三單新聞無奈壓縮處理。政府一次過將多個「政治炸彈」清倉式推出，令全港記者疲於奔命，當日傳媒「黑色星期五」亦成為近期政府心戰室經典作。

mailto:[email protected]