「被警務生涯耽誤演藝事業」， 香港 警務處處長「PK鄧」鄧炳強曾揚言自己跟成龍學做警察，又喜歡拖馬跟明星足球隊埋堆，更在今年2月香港最嚴峻的 疫情 下，跟一眾藝人及警員舉行「撐警無罩宴」，又攬頭攬頸唱K，宴上眾人口沫橫飛，如此高調廣結知己的處長，可謂前無古人，後無來者。

講起做戲，PK鄧曾經做過高薪老臨，黃百鳴也踢爆PK鄧，唔止拍新藝城一部戲，難怪間唔中會身痕過戲癮。今日香港警察官方facebook貼出一條宣傳片，硬sell撐警維穩歌《捍衛香港》，該首歌由鍾鎮濤創作，片中以洗腦式翻loop歌10秒，全程只播幾句，而PK鄧亦粉墨登場。

PK鄧並冇埋沒自己嘅演藝天份，更「影帝」上身，表情多多，為求滿足自己的表演慾，更特登清唱幾句大晒歌喉，PK鄧落力表演都希望有知音人，見該官網FB小編亦刻意阿諛奉承，打tag「處長歌聲令人耳朵懷孕了」，此影片連陳小春都在微博share。

其實PK鄧曾當臨時演員，約30多年前演過電影《開心鬼》，做「男主角……陪襯的一個朋友」，算係有對白的特約演員，他自爆係高薪老臨，人工有700港元，以當年生活水平係非常高嘅酬金，雖然監製黃百鳴對佢1984年當過《開心鬼》臨時演員沒半點印象，不過黃百鳴也好奇「乜原來以前畀咁高人工㗎？我都唔知，因為臨時演員係製片負責。不過之後聽製片講，佢唔只拍新藝城一部戲，仲拍過《聖誕快樂》。」

-----------------------------

《蘋果》英文版免費試睇： 了解更多

英文版已登錄《蘋果》App，立即 下載/ 更新 ： iOS / Android

-----------------------------

支持蘋果深度報道，深入社區，踢爆權貴，即Like 蘋果專題及調查組FB專頁 ！