呢期政圈焦點喺晒大曾細曾身上，其他政客高官全部變晒布景板，咁又難怪，大曾咁高班，親自落嚟挺細曾，自然係佢兩個搶晒鏡。好似唐英年咁，雖然身為政府喺迪士尼嘅最高級代表，上禮拜日傍晚捱義氣飛車趕入去大嶼山主持晚宴，放棄同副主席喺香格里拉個大party摸底交心嘅機會，但翌日樂園開幕大禮，竟然連台都冇得上，八方都戥佢唔抵。
不過唐唐應該唔會介意嘅，做大事不拘小節嘛。噚日八方喺會展寧波周會活動見到司長，佢同董建華坐埋一齊，又同寧波市毛市長、市發改委沈副主任有傾有講，重話幾年前「有幸到過寧波」，對北侖港同當地民企嘅快速發展留低深刻印象；又對寧波人民政府專程來港舉行活動熱烈歡迎……嗱，咁就醒目啦。想當日，煲呔都係借九加二同咩粵港合作名目，幾乎個個禮拜北上同地方官打交道，連韶關咁偏遠都去拜會，結果咪修成正果囉。

民望一人之下　未必輸梗

其實論民望，唐唐都唔差。煲呔有六十六點七分，唐唐都有六十二點五分，喺三司十一局中，只得佢同李少光兩個過六十分（李少光六十一點九），真正係一人之下，所以如果話阿爺睇民望，佢未必輸㗎。
所以現在時勢唔就，咪低調啲做實事囉。嗱，佢剛剛飛完去南韓食泡菜，下個禮拜又飛去開世界銀行會議，順便向班財金高官、央行行長推銷吓香港，為年底世貿會議做吓功夫。呢個會當年係唐唐爭取返嚟，如果搞得好，又搞得掂班專業示威者，一定可以揚名國際，威過迪士尼。
至於唐唐主責嘅銷售稅，暫時就冇乜眉目，相信要等煲呔發落。喺現時爭位壓到一切嘅考慮之下，加稅無異政治自殺，就算講吓想加稅都對自己不利，遲啲搞咪重好。君不見阿松黯然落台，底因咪就係狂加車稅；司長，搞銷售稅呢亭嘢，就唔使咁勤力喎。


爆料熱線：29290000、27860099
報料傳真：26239278
報料電郵：[email protected]