蕭芳芳、鄭秀文及林作等昨晚現身中環，出席JOYCE旗艦店活動，身穿紫藍色旗袍的芳芳姐與設計名師Dries Van Noten齊齊剪綵。芳芳姐做訪問時自爆為着旗袍，以照腸鏡，及以飲水飲湯瘦身5日，她更主動提到再任婆婆：「多咗個孫女，好開心，佢好玩到不得了，見到佢成個溶晒，第一個係男孫，呢個係女孫，為咗保護佢少探佢，佢每次嚟我屋企，我都會買禮物畀佢，佢好開心。」
芳芳姐透露數月後將70歲，但不會大搞：「咁大年紀，都係希望身體健康同孫玩。」問到好友胡楓的太太過世，由於芳芳姐聽力不好，靠記者寫問題告知，她即表現愕然，更掩面眼泛淚光：「我唔知道，冇話我聽，呢幾日？」

Sammi唔同安仔搞造型

另外，Sammi大談時裝經，笑言自己曾經歷過體重130磅，故懂得着衫顯得瘦：「減肥都要食飽，食夠先做運動，好似我老友紅姑（鍾楚紅），如果佢太奀就唔好睇，少少肉就最好睇。」Sammi笑言不用為安仔做造型：「佢着衫有自己意見，我出活動前佢會望吓，佢男士眼光出發幾準，如果肉酸，佢會婉轉提議叫我轉另一套。」
採訪：盧妹
攝影：陳俊強