《不懂撒嬌的女人》當中，最受注目當然係就王浩信同埋唐詩詠嘅呢一對啦，故事一開始就講王浩信繼續搵唔到唐詩詠，仍然每日send一張相畀唐詩詠，呢個時候王浩信嘅台妹表妹純純又現身喇，仲喺香港開咗間舖。

之後唐詩詠出場喇，就係撞到王浩信嘅前女友，講返當年王浩信甩咗ICQ初戀女朋友嘅事，呢個時候，唐詩詠終於發現，原來初戀男朋友就係王浩信，都係每日影返同一張相畀唐詩詠嘅王浩信，詩詠仲睇到喊。

當王浩信見到詩詠睇過佢嘅相之後，立即約佢哋兩個16年前約嘅地方，一直喺度苦等，等咗幾日幾夜之後，詩詠終於回覆王浩信：「唔使等喇，我唔會嚟。」後來兩個一直都用ICQ傾偈，但原來對方唔係唐詩詠，而係賤Han同純純兩個，扮係詩詠覆佢。

呢個時候，大台嘅絕技時間跳躍出現喇，一跳就兩年，賤Han已經同咗純純一齊，而王浩信就一直send相畀詩詠，直到一日王浩信終於見到詩詠，王浩信仲追埋上去，不過就發現詩詠手上已經有訂婚戒指，詩詠仲喺ICQ同王浩信講佢要結婚喇，呢個係一個好慘嘅結局。

但係大台喺播緊《不懂撒嬌的女人》嗰時，補拍咗一場王浩信同詩詠嘅戲，喺播片尾曲嘅時候播出嚟，就係王浩信同詩詠再一次相遇，詩詠手上仲要冇咗隻戒指，不過到咗呢個位就全劇完喇，最後會點就大家自己諗喇。