入行36年嘅美魔女溫碧霞（Irene），51歲之齡首次開個人演唱會。

演唱會嚟到尾聲時Irene換閃短裙襯長boots同dancers邊唱邊跳，觀眾送上巨型熊公仔，Irene演繹完陳百強《有了你》後說：「好多謝大家，由15歲開始拍戲到依家，自己經歷好多嘢。」跟住Irene想同觀眾拍大合照，點知現場播出生日歌，有靚仔攞蛋糕出嚟，Irene露出驚訝表情：「今日唔係我生日，下個月先係我生日，呢個係我第一個蛋糕。」

到鳴謝環節，Irene公開多謝老公何祖光（Kenneth），望着台下老公發表愛的宣言：「多謝Kenneth，自己同佢經歷咗好多，自己人生遇到開心同唔開心，佢都喺身邊支持我，畀好大自由度我，大家都知我個人好任性，無論我做乜嘢，佢都支持我，所以頭先唱《勇氣》呢首歌想送畀佢，因為每一個人愛都係需要勇氣，兩個人一齊時可能產生好多問題，但當你勇敢去愛，就會搵到你嘅真愛，希望大家都好似我咁，搵到自己嘅真愛。」最後，Irene多謝天上嘅父母，相信佢哋今晚都好開心，並唱出Beyond《喜歡你》送給已故父母。

安歌時，Irene唱出《難得有情人》，台上大屏幕播出Irene同老公嘅結婚相，老公更上台獻花送吻，甜蜜滿瀉，演唱會喺晚上十點二十四分結束。

精選娛聞，喺晒《娛果》
http://fb.com/appledailyent