威華達（622）上周五喺近10個月低位，turn咗近48球，成交股數創近兩個月新高，低位成交先嚟料，聞到有味，先嚟轉短打。威華達上年上半年，盈利一枝箭增長4倍，到近17億元，超靚仔。下半年打後，港股chok爆，老老實實，集團就快派2015年全年成績單，盈利係咪仲keep到喺呢個靚仔水位，有啲難度。但咁睇，威華達呢期主打金融投資同證券業，睇到有成績，又上半年呢17億元盈利，遠遠超過2014年全年盈利5.15億元，博全年盈喜，仲係有chance面。

資產潛在變現值豐厚

又威華達家陣0.41倍PB，仲要平過第一上海（227）0.45倍PB，而場內本港行家，0.8倍到最高1.9倍PB，威華達PB，平咗大截。
威華達到上年6月尾淨現金10.5億元，而同期擺喺流動資產嘅金融資產，達到41億元。保守將呢批金融資產打五折，都等值21億元，威華達市值僅25億元。
再講，上年7月，威華達通過發行約13.4億份認股權證，呢批認股權，屬強制性行使，終極集資金額達到8.6億元，亦睇到，威華達潛在集資金額、家陣手頭淨現金，同金融資產潛在變現值，勁豐厚。
又上邊認股證承配人仲要係，而且必須要係專業投資者，權證每股兌換價0.65元，威華達現價0.345元，講緊要升88%，先到兌換價。
趁有鑊氣兜轉威華達，技術阻力位250日線0.47元，威華達講緊要升36%。到時集團0.55倍PB，仲未追到大部份行家，目標價亦未高過現價同認股權兌換價，兩者平均價0.5元，未有耐炒過籠。

錢雋
細價股專家
本欄逢周一、三、五刊出