現年32歲嘅韓劇「收視福將」徐玄振，與24歲男星楊世鍾繼《浪漫醫生金實福》後，再合作SBS新劇《愛情的溫度》，新劇於本月18號首播，劇組亦陸續公開預告及海報宣傳。

徐玄振及楊世鍾雖然年紀相差8年，但拍攝甜蜜場面時一啲都唔突兀，兩人十指緊扣影海報，徐玄振又甜挨楊世鍾膊頭，真係好Sweet，而戲外徐玄振亦好似大姊姊咁照顧楊世鍾，場面溫馨，令劇迷相當期待劇集開播。

另外，徐玄振因拍攝tvN人氣劇《又，吳海英》與女星全慧彬成為好友，近日全慧彬正忙拍新劇《操作》，徐玄振就特地送上咖啡車為對方打氣，全慧彬亦同咖啡車合照並上載到Instagram感謝徐玄振。