大馬首富郭鶴年細女郭燕光（Yen）是一個倔強的女生，她的格言是：「每件決定咗做嘅事永遠都唔會放棄，我唔理要捱夜、出幾多血汗，唔可以失敗，一定要成功！」中學就讀女拔萃，會考9科取得8A、在史丹福讀書以首2%最佳成績畢業，2016年創業開創二手時裝網店Guiltless，由經歷父母反對、網店的名字風波收律師信、pop up store被爆竊損失200萬港元，3年多來Yen上了寶貴一課。

每年的營業額都以倍數上升，Yen認為尚算成功，最近公司與中東最大的網上二手平台The Luxury Closet合併，衝出海外，Yen說：「係好消息！咁啱佢哋嘅創辦人想將生意擴展到中國，佢哋覺得我哋業績好，我哋合併咗，所有嘢都會二合為一，而家我會睇吓香港有咩可以幫到發展，佢哋係大公司，佢哋嘅team有80人，我公司有10人，我一直都想Guiltless擴充去一個更大市場，香港太細，呢個係非常好嘅機會。真係好鼓舞嘅，代表公司真係做得幾好！」而Yen也功成身退，她笑言現在會當他們的顧問這小角色。

對於自己一手湊大的Baby有更好發展方向，Yen一邊廂是開心，另一邊廂又相當不捨，Yen更比喻自己為單親媽咪，她說：「我會覺得自己係一個單親母親，有咗BB，好愛佢，為佢付出所有，不過突然有對有錢老夫婦想領養小朋友，確保佢可以上最好嘅學校，乜都最好嘅，對於BB嘅未來係應該嘅，但好唔捨得。」問到會否繼續籌備另一生意？Yen決意say no！她笑說：「我要休息！阿爸好想我加入返家族生意，佢又開始嘈我，佢好想我快啲返去，幫手做公司嘅investment team，媽咪就最開心，佢好擔心我，佢覺得我好辛苦，家姐阿哥有公司司機，又有成個team幫佢哋手，我就要自己揸車（其實我自己鍾意揸車），阿媽就會問點解我嘅細女要咁辛苦？但佢而家好開心。」

父親郭鶴年是大企業家，Yen對父親十分敬重，視父親為榜樣，問父親對於她首次創業有否給予意見？Yen說：「我爸爸好有智慧嘅，知道迫我做嘅事，我會怨佢哋、會唔開心，佢話我知覺得二手市場好細、好難做，就算做到全香港最大，都唔會賺到好多錢，但如果明知都要繼續做，佢會支持我嘗試，起碼可以學識賺錢有幾難。」

在這3年間Yen學懂任何事也要做好防範，所有假設與現實也有很大的距離，沒有賺得一大桶金，卻賺到創業的成長經歷，也是賞心樂事。

採訪：羅慧敏
攝影：周樂恒
攝錄：林德雄
場地提供：Tram View Cafe

-----------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9

-----------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9