梁芷珊讀書時兼職做model，又拍過周星馳的神劇《他來自江湖》，扮演黃秋生的女友Maggie，她更是一位作家，筆下散文和小說逾50本；又是一位填詞人，寫過400多首歌，包括：黎姿《白裇衫》、鄭伊健《一生愛你一個》、陳小春《取消資格》，代表作是許志安的hit歌《唯獨你是不可取替》，婚後棄文從商成為女強人，現回復單身的她除搞生意、做球星和廚師的經理人，更想再執筆填詞。

當年由model轉做填詞，原來因為舊愛練海棠——現在是伍詠薇老公。

芷珊說：「我嗰時做model係唔夠高，5呎7吋半，行catwalk係5呎9吋，自己好少騷行，只可以做啲影相，覺得唔係真係model，因為當時我男友係寫嘢……」

記者好奇問男友是誰？芷珊好坦白：「練海棠。當時唱片公司搵佢寫歌，到要交歌嗰陣佢話趕唔切，我話唔緊要，我都陪你聽咗咁多日，不如我寫幫你交，佢話好呀，你試下，如果人哋唔要就算啦，所以我寫咗第一首歌，梁漢文嘅《想着你等着你》。之後再有人搵佢填，佢話唔係佢填㗎，係一個女仔叫梁芷珊填，我就開始咗填詞，少咗做model。」

之後芷珊出書寫專欄，被冠上才女的光環，她笑說：「才唔才女，每年書展你個位靚啲咁解啫，係開心嘅，唔會覺得壓力，嗰時開始寫嘢，但媽咪同我講：『你好似唔使返工咁，唔係好掂，日日瞓到咁晏，搵份工做啦！』我驚阿媽擔心我，就一路搵工一路寫。

「其實填詞搵得多㗎，以前改編歌$9,000，冇得收版稅，原創歌就$6,000，可以收版稅，咁多年收得最多《唯獨你是不可取替》，隻歌唱到依家，咁多年六位數字。」

芷珊跟娛樂圈的關係，除了曾做model和填詞人，亦拍過唯一一部電視劇，就是星爺的神劇《他來自江湖》：「嗰時讀緊書，拍好多廣告，TVB搵我拍《香港小姐》宣傳片，嗰時好幼稚，宣傳片搵我拍，即係靚過香港小姐啦，咁我唔選港姐啦；跟住劉家豪睇咗宣傳片，咁啱要搵呢個角色，但我拍完發覺自己唔識做戲，識做戲嗰啲黃秋生、周星馳咪做咗影帝囉，所以唔好勉強，好快狠下決定做marketing兼職寫歌詞做作家，到冇人買書啱啱嫁人，之後學做生意，雖然不幸離婚，但呢15年冇枉過，希望羅生（前夫羅傑承）都係咁諗。」

撰文：余燕儀
攝錄：廖達燊
攝影：沈健程
場地：Spark Bar & Restaurant

精選娛聞，喺晒《娛果》 http://fb.com/appledailyent