王宗堯、蘇麗珊、游學修和周家怡等人噚晚喺尖沙嘴出席電影《復仇勇者》首映，久未露面嘅周家怡，着黑色透視嘅deepV衫，非常性感。

曾經同莊思敏隔空罵戰駁火、鬧到面紅耳熱嘅王宗堯，噚日突然冇晒火．佢話：「好開心完成件事，係創舉，我哋幾經調動時間先可以完成一日戲份，大家做嘢認真，控制得到。」問到佢有冇對莊思敏改觀，佢話：「大家都冇乜，見佢染咗深紅，佢好專心做晒，好盡力。」

講到早前游學修上港台節目《我係乜乜乜》輸咗畀大劉劉鑾雄個大仔劉鳴煒，事後唔少人覺得游學修明輸暗贏，佢話：「冇諗過呢樣嘢，各有各意見，我唔會自居男神，事實係差好遠，我覺得自己見識唔夠同經驗淺。」在旁嘅女友蘇麗珊被問會選擇哪類男士，佢就甜笑話：「咁梗係揀佢（游學修）喇，我覺得同有錢人一齊，距離會太遠，我係草根家庭出身，平凡會開心啲！」

林芊妤（Coffee）被問到有冇為前男友林知譽結婚而傷心，佢話：「一啲都冇，件事過咗咁耐，戥佢開心！」當時有冇傾過婚事？Coffee坦言：「冇諗到結婚咁遠，發生呢件事，各有各生活，佢太太好靚女，好匹配。」會唔會覺得對方唔請佢去婚宴，感覺小家？佢話：「唔會，其實唔係好熟，大家明白，如果我喺現場反而會令所有人尷尬，希望唔會影響到佢，件事影響大家好深！0依家我對所有男人都會避忌，可以話係怕，雖然0依家身邊有啲男人係有機會，但係未開始。」