民間電台今日會再次公民抗命復播，發起人「阿牛」曾健成同幾名成員噚日帶備新器材，冒住三號波狂風暴雨攀上獅子山，唔係揭竿起義咁戲劇性，而係豎起條天線準備今日廣播。

發射站改用「水電池」

八方捨命陪君子一齊上山，見到佢哋成班人孭咗多件新器材登山架設「發射站」，呢個土炮發射站結構簡單，用一張木凳豎起支天線，再將條天線接駁其他儀器，加埋一部用Wi-Fi上網嘅電腦就大功告成。八方以懷疑目光望住呢嚿嘢，阿牛即刻拍心口話冇問題，因為佢哋今次有新「法寶」。
阿牛透露，以前發射站用太陽能發電，所以天線要固定安裝喺有太陽照射到嘅地方，唔可以全天候使用，加上成本要成接近6,000蚊，俾廣管局充公好肉赤，所以佢哋決定改用只賣300幾蚊一嚿嘅汽車用「水電池」做能源，成本平又方便拎住四圍走「打游擊」，就算好似呢兩日咁橫風橫雨都唔受影響，實用好多。阿牛笑言近日雨水多，民間電台唔用太陽能改用「水力發電」啱晒。八方建議民間電台可以改用更環保嘅「風力發電」，事關泛民中人最擅長吹水，正一口水多過茶，一齊發功嘅話，保證動力源源不絕。
講番正經，土炮發射台搞掂後，成班人喺獅子山頭播出《自由花》試驗廣播效果，八方現場聽效果唔錯，阿牛打電話問山下兄弟收得清唔清，左搞右搞成兩個鐘頭，確定多個地區都可以用收音機喺FM102.8聽到歌聲後，阿牛宣佈試播成功，準備今晚7點光榮復播！

今晚7點旺角開壇

復播頭炮係泛民成員喺旺角街頭討論開放大氣電波問題，各泛民黨派早前已同意派人出席，支聯會主席華叔、民主黨李永達、前綫卿姐、職工盟李卓人、社民連長毛、陳偉業同毓民都會開咪，公民黨張超雄表示家有要事唔到，民協新主席廖成利臨陣「縮沙」，阿牛指民協擔心「非法廣播」俾人拉，所以唔派人出席。
打風唔成三日雨，阿牛強調民間電台復播風雨不改，鐵定今晚7點開咪，「就算八號風球都未驚過！」佢又話唔怕當局搵人掃場，因為今日條天線會安裝喺更高山頭，官僚上到去拆天線，節目都已經出晒街咯。
mailto:[email protected]