【銅鑼灣】章小蕙同「白頭陳」陳曜旻當年嘅一段情轟動一時，陳曜旻個女陳小韻（Cara）亦自此成為焦點，但隨住陳曜旻同章小蕙嘅分手，加上陳曜旻宣佈破產之後，陳家開始變得低調，近乎絕迹ball場。09年Cara嫁畀任職投資銀行嘅Kin，咁多年專心相夫教子，自從11年生咗個仔Liam後，原來Cara三個月前再生咗第二個仔Oliver，日前Cara就同老公、大仔同兩個長輩一齊到銅鑼灣享天倫樂。
Cara同家人當晚7點半左右到銅鑼灣開平道嘅食肆食晚飯，未見白頭陳嘅出現，而細仔Oliver亦未有現身，只係見到Cara同老公、大仔Liam相當開心，Liam一直由爸爸又抱又拖，活潑嘅佢不時望着隨後嘅Cara，好溫馨。而Cara生完三個月仍未收身，面圓圓咁，一家人食足三粒鐘先至盡興而回。

全人奶餵B

前日Cara接受電話訪問，提到再生仔，佢話：「係呀，細仔已經三個月大，哥哥好錫細佬，成日都會扮啲動物聲，又會唱歌畀細佬聽。𠵱家都係自己湊，我好鍾意亦好enjoy，𠵱家哥哥讀緊學前班，之前佢上playgroup、學游水，一星期五日，我都自己帶佢，唔會辛苦。」Cara更透露現時以全人奶餵Oliver，佢話：「之前餵哥哥時就辛苦啲，細仔飲奶嘅時間隔耐啲，佢都戒咗夜奶，所以冇咁辛苦。」一直希望追女嘅Cara似乎有意封肚，佢話：「唔會再生啦，湊BB好辛苦，都唔一定追到女，𠵱家兩個仔都好開心，希望佢哋身體健康。」
採訪：陳辰、梁繼光、李志明、唐如