著名財經專欄作家曹仁超（曹Sir）上月公開患完胃癌再患淋巴癌嘅消息，好在當時治療已到尾聲，佢上周四更加喺秘書嘅陪同下公開露面，精神不俗。原來佢已經復工，但只係每周返去基金公司半日，又謙稱已經唔識睇個市，以後「可以唔講就唔講」，意味有機會淡出。
曹Sir噚日透露，身上淋巴瘤只餘1厘米大，醫生評估緊需否做電療。佢7月開始重新投入基金工作，但只為「有番啲細藝，無謂同個市太脫節」，所以每周只返半日。佢個基金有三位股東、五名員工，今年回報有7.5%，佢形容「起碼跑贏香港政府」，因此冇諗過要結束。不過佢就唔想再評論個市咁多喇。

自言唔識分析滬港通

佢認為，滬港通推行之後，國企紅籌當道，股市已經越來越難估，亦越來越多人問啲佢唔識嘅嘢，以後會少講為妙，尤其牽涉內地經濟嘅問題，「打老虎問我點評論啫？周永康我唔識喎，周星馳我就識，喺電視度識嘛」。聽見曹Sir識講笑，肯定佢真係病癒了。
佢繼續發揮幽默本色，打趣話「我係評論員，唔係推銷員，知我就講，唔知我就唔講，我唔識分析滬港通，人哋識就人哋講」，又話「好似（新地創辦人）郭得勝咁，我識咗幾廿年，三個仔同我同一個時代大，（長和系主席）李嘉誠又係識咗好耐，我知佢啲邏輯思維，但內企管理層我真係唔識㗎嘛，原來佢哋連主席都可以失蹤嘅，我都係第一次體驗到」，明顯係寸緊諾奇（1353）董事長丁輝涉嫌走佬，可見曹Sir仲好貼市㗎！

李華華
mailto:[email protected]