混血女星水原希子（Kiko）由日本紅到亞洲各地，佢最近同已婚型男妻夫木聰宣傳合作新片《想成為奧田民生的男孩和讓男人瘋狂的女孩》，二人奉旨扮成情侶檔，不過聰仔已婚形象深入民心，而Kiko同G-Dragon分手後跟野村周平更打得火熱，搞到呢個銀幕情侶可謂毫無說服力。

Kiko日前到中國開工，全女班唱K玩到癲，其實佢每逢身在日本，就定必同野村周平享受二人世界。Kiko同野村周平發展兩年嘅姊弟戀感情穩定，二人多次被拍到公然拍拖，今日出版雜誌《週刊文春》又拍得兩人於本月15日恩愛出巡，夜晚二人到目黑區居酒屋飲飽食醉後，在街頭拍拖當堂斷正，Kiko見記者立即彈開兼掩面，本來搭住女友纖腰嘅野村周平見狀都即刻鬆手，並大方地接受訪問。另外，Kiko登上時裝書《ViVi》封面，更拍攝性感內頁寫真。