佐敦街頭凌晨出現一幕黑衣男趴在的士車頂驚險情景，3個大男人圍住的士唔畀佢走，除左拍打車門同用垃圾桶阻路，其中一人更爬上車頂捉住車邊，跌左落嚟又再爬上去，好似拍戲咁，最後要到場警員將佢拉落嚟，事件才結束；而引發呢宗紛爭，據講係的士司機車左佢哋識嘅一個女人，佢哋想截住的士時疑被「楷親」引起，但3男卻因此惹上官非。

事發噚日(5號)凌晨近3點，一個17歲女仔同21歲黑衣男喺油麻地佐敦道近彌敦道行人路吵交後，個女子係燈位前行人路截停一部的士想走，黑衣男擬截停的士時疑被架的士車身楷到，黑衣男情緒激動，聯同兩名友人圍住架的士唔畀駛走，3人不停拍打的士車門同玻璃窗，其間一人拉左垃圾桶去到的士車前阻路，黑衣男則爬上的士車頂弄毀車頂燈箱，跟住又爬落車尾廂，的士司機驚受傷害，撞開垃圾桶開車走，黑衣男被拋跌地上。

據目擊者張生話，當時燈號為紅燈，的士仍強行駛出彌敦道，但行左一半，一架警車已到場攔住的士，但黑衣男未肯罷休，又爬上的士大字形趴係車頂，唔肯落車，要警員拉佢落嚟，當時佢仍好激動，想走向的士找司機負氣，被警員攔住。

警方稱，21歲姓吳男子與女事主爭吵後，見事主截乘的士，想阻止的士駛離時與司機爭吵，曾拍打車門同爬上的士車頂，其兩名友人姓劉(39歲)同姓蘇(46歲)從旁協助，3人同涉刑毀被捕，蘇更揭發沒帶身份證。

你敢爆，我敢獎！ 即Call《蘋果》24小時爆相爆片熱線 ：63836568