今年26歲嘅蔡思貝，除咗花名叫「高分貝」，亦有另一個名叫「發電機」，事關蔡思貝幾乎拍親劇都同拍檔傳緋聞。今年5月，唐詩詠同拍拖3年嘅洪永城宣佈分手，當時同洪永城拍緊新劇《大帥哥》嘅蔡思貝，即被指係第三者，介入洪、唐感情，導致二人分手。

當時蔡思貝就好委屈咁話：「覺得事實就係……幾無奈。我同Tony拍過幾套電視劇，我哋只係正常同事、正常朋友。我覺得佢同Natalie嘅感情事，交留番俾佢兩個處理，俾啲時間佢哋。請大家唔好拉埋我落水。」(新聞連結： http://bit.ly/2rK31qG )

事隔4個月，今日再有周刊報道，指蔡思貝同洪永城拍《大》時，日對夜對，女方更自製機會埋身親近，做咗單身寡仔嘅洪永城，亦覺食得唔好嘥，不過吸取上次教訓後，二人都變得小心避忌，免劇組發現。

不過，報道指人前扮唔識唔熟嘅佢哋，經常約埋一齊做運動，更曾有劇組人員目睹蔡思貝半夜三更喺洪永城酒店房行出嚟。而二人早喺兩年前拍《味想天開》時已有傳分別瞞另一半暗撻，有指當時洪永城更激嬲唐詩詠，女方首度提出分手。