韓國天團BIGBANG成員勝利大前日27歲生日，連日來佢都獲好友為佢慶祝生日，勝利更飛去唔同地方舉行生日派對，噚日就於廈門慶祝生日，今晚就會現身澳門舉行見面會，跟粉絲慶祝，聽日佢就喺韓國出席活動，真係非常頻撲。不過勝利似乎好享受，不停於Instagram公開慶祝生日嘅相。

而喺噚日播出嘅節目《本業是歌手－這些傢伙的兩種生活》中，BIGBANG所屬嘅YG事務所編舞團長李宰旭以嘉賓身份出演，當問到跳舞最好嘅藝人時，李宰旭表示：「志龍（G-DRAGON）係學得最快嘅，勝利係最差嘅，因為佢好明確自己嘅風格，即使係要大家一齊排嘅舞，都只有佢會堅持自己嘅風格。」

另外，同BIGBANG同屬YG事務所嘅音樂人KUSH今日被爆因涉嫌吸食可卡因被捕，據知KUSH以快遞方式購買可卡因，由於KUSH認罪故以不拘留方式起訴，當中KUSH表示因為患有抑鬱症，所以曾經兩次購買毒品。

更多娛聞，喺晒《娛果》
http://fb.com/appledailyent