曼聯下月底會喺英超作客曼城上演曼徹斯特打吡，呢場波對兩支球隊爭前四都非常重要，向來同哥迪奧拿都有「牙齒印」嘅曼聯前鋒伊巴謙莫域就話：「諗起呢場波都high爆呀！」

哥迪奧拿喺2009年仲帶緊巴塞隆拿果陣簽入伊巴謙莫域，不過佢兩個嘅關係維持唔到幾耐，伊巴踢咗一季就被外借到AC米蘭，之後仲正式轉會。呢位瑞典前鋒之後每次有機會講起哥帥都唔會收口，仲話好期待下個月場曼市打吡！佢話：「我喺巴塞學到一樣嘢，就係喺球圈入面，咩嘢事都可以喺24個鐘頭之內變晒。我哋之間嘅問題唔喺我度，而係哥迪奧拿果邊，但佢始終都唔可以面對現實承認錯誤，我根本唔知佢做乜咁唔妥我！」