煲呔噚日喺禮賓府宴請全體立法會議員，據知有唔少議員出席，煲呔仲好鬼識做，連續兩年揀范太生日當日宴請議員，仲做足工夫攞個大蟠桃出嚟為范太賀壽，𠱁得62歲嘅范太鬼咁歡喜。
八方聽聞噚日都有唔少高官出席，包括唐唐、周一嶽同一哥等，煲呔喺開場白玩自嘲娛賓，笑到班議員肚痛。煲呔將佢自己過往嘅金句，例如「我要做好呢份工」、「有啲政改方案天堂至有」串成一篇文，叫大家計吓佢究竟講咗幾多句金句，贏咗可以攞支酒走。
有白鴿黨議員笑笑口話，煲呔上次同佢哋食飯，就帶咗啲內地省市送嚟嘅酒；今次枱上嘅酒，睇怕極有可能係內地貨，覺得煲呔真係夠晒環保。