章小蕙舊愛「白頭陳」陳曜旻嘅女兒陳小韻，喺09年嫁咗俾任職投資銀行嘅老公Kin之後，o依家已經做咗兩子之母，大仔Liam約5歲，細仔Oliver約兩歲幾，兩兄弟精靈活潑，同爹哋成個餅印，真係見到都覺得開心。

陳小韻曾經講過想追個女，但係覺得湊仔實在太困身，已決定封肚，所以佢嘅身型仲keep得好fit，正式收身成功。《蘋果》日前喺銅鑼灣見到小韻個靚仔老公Kin，揸住架白色Tesla，一家四口出動親子樂，佢將架車停咗喺百德新街，跟住行咗去食街搵嘢食，行吓行吓去咗買雪糕。

話晒雪糕呢樣嘢真係令唔少人着迷，尤其係兩個小朋友，梗係想第一時間揀鍾意口味，不過因為個雪糕櫃有一定嘅高度，所以小韻同老公一人抱一個，等佢哋慢慢揀心水雪糕，結果好努力咁揀咗一輪之後，最後買咗兩杯雪糕一齊食。睇見佢哋一家四口邊行邊食，你一啖我又一啖，又真係幾溫馨，食飽飽之後上車走人，再去下一個地方繼續玩。