當年今日

地產多聲道:世紀21追女橋贏得富山歸

蘋果日報 2002/08/07 00:00


黃大仙代理行一哥富山地產,噚日簽約加盟世紀21,富山老細柯興捷躊躇滿志話,未來半年會喺九龍灣同九龍塘開多兩間分行,增聘30個前線員工,遲啲入埋內地,明年率先在廣州開分行。
世紀21成功,幕後功臣鄒偉霖以追女仔形容箇中艱苦過程。第一招叫「男兒當自強」,先壯大自己聲勢,吸引對方青睞。世紀21積極搵銀主盤同一手盤,銀主盤源個幾月間增加千幾二千個,而馬鞍山新盤海典灣一役,世紀21做到一成半市場佔有率,令富山留下深刻印象。但富方態度依然猶豫不決。
第二招係「兄弟政策」,利用馬鞍山及將軍澳加盟商同富山老細之間嘅友情落嘴頭,游說加盟,令兩行關係跨進一大步,但富山仍未肯「以身相許」。
世紀21惟有使出最後一招「單刀直入」,準備好合同,親自去富山總行,利用誠意打動對方!其實追女仔同做生意,誠意始終最有效。

記招撞期細發展商冇着數
踏入8月份,發展商齊齊開記者會,今日就有四單。長實開放長沙灣泓景臺全新示範單位,同時公布新付款方法。南豐小欖浪濤灣就喺現樓,講講最新銷售安排。九龍建業觀塘海天園請傳媒參觀頂層複式全海景單位。廖創興企業又再請睇九肚山皓朗山莊。
突然間有咁多記者會,大發展商點都請到記者去,但細發展商就慘,報館唔夠人就實cut佢哋先,就算採訪,篇幅都唔會大,所以部份細發展商都好識做,盡量避免同期發布消息。不過近日佢哋都大歎避無可避,撞期都要開記者會,否則預備好嘅嘢都要報廢。好似均來屯門愛琴灣,就改咗幾次期,終於落實本周五開記者會,但都擔心緊同日有其他大盤撞期。
船王千金大有斬獲
船王包玉剛千金包陪麗,剛賣出持有超過十年嘅山頂白加道27號豪宅,套現過半億,帳面賺唔少。包小姐91年用千八萬,買入大廈頂層複式,四千五方呎,連近千八呎空中花園,現以五千六萬轉手,升值兩倍幾,淨袋三千八百萬。
呢個豪宅唔係獨立屋,又有二十八年樓齡,到𠵱家依然有市有價,造價超過萬二蚊一呎,樓市高峯期曾經做過萬九蚊呎,唔知同幢大廈可以清楚望晒政務司司長官邸有冇關係呢?

舊戲院買少見少
VCD、DVD普及,好多戲院拍烏蠅,舊式一啲都要搵出路。旺角砵蘭街180號南華戲院1樓,八千方呎,上月底以十九萬五千蚊,由一家夜總會承租。知情人士話,戲院地下連1樓,總樓面過兩萬呎,業主之前已將地下近萬呎租畀人做芬蘭浴室。戲院只得數千呎,名副其實迷你,入口亦由豉油街改往砵蘭街。戲院同夜總會都係娛樂事業,但前者正經,後者偏門。
趙國雄玩人唔使本
大角嘴凱帆軒做宣傳,同新城合作之餘,更搵埋香港天文台。三方合力炮製「維港觀賞指數」,喺凱帆軒設個監察站,8月中開始,每日每個鐘都會透過新城電台同網頁,發布維港嘅能見度。初期由負責樓盤銷售嘅尹紹剛每日喺凱帆軒報道指數。
長實趙國雄話,尹生夠後生,毛髮都未生齊,又冇老花,睇指數會準啲。如果太陽猛,佢個頭都可以成為指數喎,因為光到「立立令」。司儀即時好幽默咁話,要設多個陽光反射指數,搞到尹生好尷尬。

美記成為大贏家
東涌海堤灣畔上個禮拜六公開發售,成績一般,而美聯新任營業董事黎偉強透露,美聯有逾五成市場佔有率,所以日前設宴慶功。由於近排代理行好多員工升職,大家都希望交到好成績畀老細睇,有新盤賣一定要打醒精神,相信啲夥計都要搏命至得。
要做到好成績,樓盤開放示範單位時已經要出盡辦法拉客,蘭西聽講就因為咁,搞出好多不愉快場面,例如個細路女唔見咗媽咪,當場大喊;個客或代理被推跌等,總之見到都怕怕。
蘭西
電郵地址:[email protected]