張達明太太、心理學家何念慈最近推出新書《十月關係》，部份收益捐予護苗基金。今日眾人於金鐘太古廣場出席宣傳，黃秋生同陳志雲等亦應邀出席，達明更加帶埋仔女，舉家出動撐太太。

秋生受訪時話:「幸福係一種安全感，冇得量化，係一種個人感動，要經過練歷才可沉澱到。」問佢經歷過種種之後如何企番起身重新開始？秋生話:「放低包袱，18歲重新做人，唔好因為行為而有藉口。」

志雲就話:「你哋邀請我嚟，我都好懷疑，不過諗諗下，都係有女人先有我。」又自爆母親懷孕12個月先至生佢，更自爆細細個俾人侵犯過。

受訪時，問番頭先話「幸福係一種安全感」嘅秋生，0依家有冇安全感呢？事關之前佢同女助手去維園睇貓，結果太太嬲爆，唔俾秋生返屋企。家陣秋生又點呢？佢就笑笑口話:「0依家由我老婆保護我，好狼死0架，好慘!我依家入到門口，但要睇佢面色囉!」

問番秋生點解會覺得幸福來自安全感呢？佢就話:「細個讀演藝嗰陣，有一晚喺屋企，倒咗杯熱奶讀書，抬頭一望，嗰一刻有幸福之感，係發自內心微笑，因為寧靜，所以覺得安全。」

有老婆之後更幸福？秋生話:「係呀，所以我有安全感!」咁如何報答老婆？秋生:「以身相許囉，無以為報。」問佢不如請老婆去旅行當報答啦，秋生就話自己怕去旅行，寧願負責搵錢請老婆去。咁你太太咪好幸福囉？秋生話:「希望係啦!」

講完自己，又講下反佔中先。講到話連日來不少藝人名人，都公開表達自己反佔中立場，未知秋生點睇？佢就話:「我唔係反佔中嘅，但中文嚟講，唔係黑就係白，冇中間位，你唔支持即係反對。但在於我立場，我係中立。香港每個人都有自己個人睇法。」