美國奧斯卡金像獎曲終人散，而香港嘅金像獎就會喺4月9日喺尖沙嘴文化中心舉行。自從今個月頭公佈咗入圍名單之後，55位金像獎專業評審就要開始佢哋嘅工作，開始睇片。而好多戲都因為已經上映，所以金像獎大會會向呢55位評審提供影碟，等佢哋可以投票畀分畀心儀嘅電影同人物。

根據金像獎條例呢55位評審佔55%嘅評分，足以影響得獎結果。所以去年《十年》贏最佳電影大獎，有老闆會同影協就曾經動議，擴大專業評審嘅人數或者減少所佔嘅百分率，較咁多嘢都係盡量令到賽果喺控制之內，唔會再有《十年》呢啲電影出現，最後好在喺大多數金像獎屬會投反對票下，動議被否決。

講返今屆金像獎，當有會員月頭去到金像獎辦工室借碟準備睇碟評分時，發現周星馳導演嘅《美人魚》只有一隻碟可以外借，而碟嘅數量係由電影公司方便提供。或者有關方面覺得正常人都會睇過套戲，又或者信心十足都未定，但有專業評審就話差唔多要即借即還，唔係55位評審幾難喺截止評分前睇到套片。相反有啲未全線上映嘅入圍電影好似黃進導演，曾志偉、余文樂主演嘅《一念無明》、吳鎮宇同古天樂嘅《脫皮爸爸》咁，都冒住流失同畀人翻拍嘅危險，提供咗超過10隻碟畀大會，到近日呢個現象先至有改善，唔知係咪有評審投訴定電影公司都覺得，一隻碟55人分有啲過份，到最近已火速補夠碟畀金像獎大會，等啲評審唔駛輪得咁辛苦。