當年今日
關於我們

有運到:又紅又紫發財有仔生

蘋果日報 2005/04/20 00:00


起種植物催運,即時諗起富貴竹、鐵樹等「悶蛋」盆栽,放喺屋企真係老土到爆!想屋企風水好啲,又唔要老土?原來只要揀啱顏色擺啱位置,七彩繽紛的鮮花一樣可以趨吉避凶。要精神爽利、考試第一?即刻去買花啦!

記者:馬慶武
攝影:伍慶泉
資料提供:方海閱
場地提供:繽紛園藝鮮花店(23809136)
金黃抗疫症
流感高峯期就快到,除咗注意個人衞生之外,擋擋煞氣亦唔少得。今年的病位為瘟疫位,屬土,土生金,放金黃色的花就可以有助化解病位的煞氣。

擺放方位:西北
empty
黃金球
五代同堂、銀柳都可化煞,要In一點,連個名都好意頭的黃金球是個好選擇。
綠色考試掂
考試季節又到,增強學業運最重要,咁就要在旺學業的文昌位下功夫。文昌星屬木,綠色植物同樣屬木,可令文昌星更加旺勢。緊記切忌在文昌位放非水種植物,否則隨時出現反效果。

擺放方位:屋內正中
empty
綠掌
唔嫌老土嘅話,放富貴竹就夠晒傳統。想靚啲新潮啲,水種綠掌一樣奏效。
紅色冇是非
是非運唔要催旺要化解。是非星屬木,要以屬火的紅花洩木氣,化是非。無是非纏身,工作、學習都可以更專心,絕對百利而無一害。

擺放方位:東南
empty
火百合
火百合紅得來有層次,帶點霸氣,是化煞的好幫手,身邊小人自動消失。
粉紅有人緣
人緣星屬水,粉紅色花屬火,做到水火既濟,可以令人緣融合。人緣運好,有利人際關係,同親人、同事、甚至上司相處更融洽外,桃花運亦會更強。

擺放方位:西南
empty
蕙蘭
百合、蘭花等粉紅色花,都可增強人緣運,而呢期最新鮮又最靚嘅就係粉紅色嘅蕙蘭。
紅黃兩色一擺發財
由於正財星屬土,而紅色屬火,火生旺土,增強正財運。偏財星屬金,金黃色同樣屬金,因偏財星今年較弱,所以要以金相配,增強運勢。喺家居嘅正南面放紅花,可以催旺財運。至於偏財,就要靠黃花。

擺放方位:南方(正財)、東北(偏財)
empty
朱頂蘭
朱頂蘭色澤火紅,相當奪目,而且擺放時間較一般鮮花為長,所以是旺財的最佳選擇。
empty
向日葵
向日葵花瓣金黃,充滿陽光氣息,大大朵夠晒奪目,是旺偏財的首選。「細種」向日葵一樣得。
紫藍屬火旺結婚生仔
喜慶運好自然多喜事,想結婚生仔就要增強喜慶運。喜慶星屬火,要以同屬火的紫、藍色花加強運勢。

擺放方位:正北
empty
海棠
淡紫色的海棠四季都可以買到,容易種植,而且生命力強,要結婚生仔,四季都一樣可以催谷。
empty
藍玫瑰
紫、藍色花朵,色調較冷,本身已夠晒有型,風格獨特的藍玫瑰,更添浪漫氣氛。