喺傑斯勾弟婦事件上，佢細佬一直係扮演受害者角色，但原來佢都係一擔擔，仲衰到send情慾短訊同埋自拍鹹相畀個18歲o靚妹。所以話，傑斯兩兄弟都算一門雙「傑」，大家都咁賤。
曼聯嘅37歲威爾斯球星傑斯，自從被揭發搞婚外情，偷嗒前威爾斯小姐托瑪絲同埋弟婦娜塔莎後，被英國小報咬住唔放，話佢搞娜塔莎阿媽、迫娜塔莎墮胎同畀掩口費細佬洛尼；總之新聞無日無之，內容就越爆越墮落。日前英國傳媒又爆料，話傑斯自傳出性醜聞後，佢老婆斯泰茜要同佢分房瞓，但呢單同洛尼嗰單新聞比，簡直係小兒科。
34歲嘅洛尼俾阿哥一頂綠帽由頭笠到落腳趾尾，大家以為佢慘過梁天來，但實情原來唔係咁。一個18歲嘅o靚妹同英國《太陽報》爆料，話早幾日喺機緣巧合下透過短訊識咗洛尼，之後對方就send啲情慾短訊同鹹相畀佢。嗰o靚妹話約過洛尼出嚟，而且洛尼send過張大頭相同埋赤裸上身嘅相畀佢，並要求呢位姐姐仔send番張出浴照回禮，不過就拒絕咗。

o靚妹爆料：要令佢好開心

個o靚妹仲話，佢問洛尼係咪已經同老婆好番，洛尼就咁答：「我絕對唔會同佢好番，我恨不得快啲離開佢。」而o靚妹又表示之後同洛尼傾過幾次電話，不過就冇見過面。佢話：「洛尼喺電話度話想我去搵佢，仲話要我令佢好開心。我問即係點，佢就答『自己幻想吓啦！』我認為佢諗緊賤嘢，個心好唔舒服。講真，佢做得我老竇有餘啦！」
喺英國《太陽報》爆料嘅同時，英國《鏡報》亦話洛尼為咗啲小朋友，決定畀多次機會娜塔莎。表面睇佢好似好大方同偉大，但換個角度睇，原來佢同老婆以及阿哥都係一樣，鍾意出嚟玩。點都好，一隻手掌拍唔響，傑斯確實賤爆，但洛尼都唔見得係好人，真係唔抵可憐！一門雙「傑」搞成咁，完全係自己攞嚟賤。