由韓片《屍殺列車》孔劉主演嘅tvN新劇《鬼怪》，將於下周五首播，噚日一眾主演就跟編劇金恩淑及李應福導演一齊現身發佈會造勢，同時公開長達6分鐘嘅新預告。而今次新劇除咗有孔劉、李棟旭兩位型男外，仲有「劉德華」。

講緊嘅唔係有香港「民間特首」之稱嘅劉德華，而係韓星陸星材於《鬼怪》中飾演嘅角色名。新劇中，劉德華（陸星材飾）係含住金鎖匙出世、經常闖禍嘅大企業長孫。對於點解新劇角色名要用香港藝人個名，編劇金恩淑噚日於發佈會上坦言係出自私心，表示：「當年睇香港電視劇時，劉德華都曾經係我嘅oppa。」有網民就留言笑問：「唔知金恩淑編劇有冇打算趁機會邀請真嘅劉德華客串演出？」

而於6分鐘嘅新預告中，率先公開更多孔劉及李棟旭嘅同居生活，當中李棟旭非常嫌棄孔劉、而孔劉又要纏住對方嘅場面，令劇迷更加期待呢一對「HeHe」兄弟線。