福山雅治喺婚後首部電影《SCOOP!》中扮演狗仔隊記者，可惜反應未如理想，上星期六開畫只打入本周票房榜嘅第4位，不敵6星期票房冠軍嘅新海誠力作《你的名字。》、湯漢斯（Tom Hanks）主演嘅《薩利機長：迫降奇蹟》（Sully）同埋動畫《聲之形》。

《SCOOP!》由福山雅治拍住22歲青春女星二階堂富美組成嶄新組合，二階堂都算係圈中數一數二嘅新世代性格女星，年前忽然接拍性感寫真已嚇得粉絲O晒嘴，點知近日佢再以性感形象示人，為成人雜誌《週刊Playboy》拍攝50周年廣告，二階堂cosplay成兔女郎拍攝硬照廣告，出版社更於東京鬧市展開宣傳攻勢，將二階堂擺出邊趷籮邊啜手指甫士嘅海報掛於大廈外牆，有網民呼籲各位司機大佬要小心揸車。