澳門賭業越做越旺，銀娛（027）創辦人呂志和都壓倒四叔、彤叔，一躍成為亞洲第二富豪，可見賭業前景不俗，唔少賭場老闆仲計劃衝出澳門，去海外開賭。有「股壇壞孩子」之稱、新鴻基證券創辦人馮景禧兒子馮永祥（Tony）亦想試做賭業大亨，一嚟就遠赴澳洲，落實收購澳洲大堡礁賭場。

15億買大堡礁賭場

馮永祥噚日落實以15.4億元（2.14億澳元），全購大堡礁賭場信託（Reef Casino Trust），呢個信託最值錢嘅資產，就係喺澳洲昆士蘭北部凱恩斯擁有當地唯一一間賭場酒店The Reef Hotel Casino。
消息公佈後，刺激呢隻信託嘅股價升到去六年高位，單日飆高四成。雖然𠵱家單刁仲未完全拍板，但係信託嘅大股東對於收購建議相當支持，馮永祥要做「賭神」應該指日可待。
馮永祥最為人所熟識當然係多年前，佢同拍檔馮耀輝旗下禹銘（666，現為新工投資）多次提出「一仙收購」，目標包括中巴（026，現為中華汽車），「馮兩老」2006年後淡出禹銘，低調一段時間，2009年突然又出手，借一隻創業板殼將快意節能上市，其後獲體操王子李寧睇中注資，變成非凡中國（8032），馮兩老因而勁賺一筆。
呢單刁之後，馮永祥又回歸低調，早幾個月已傳佢有意斥資290億元喺大堡礁附近興建綜合賭場度假村，今次落實呢單似乎係另一單。話明「股壇壞孩子」，唔知佢幾時將呢個賭場帶回來本港股票市場呢？

李華華
mailto:[email protected]

足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24