杜汶澤同盤菜瑩子將於11月喺伊館舉行四場「毛台劇」《我殺死了尊貴客戶》，二人日前接受《蘋果》專訪，對於阿澤經常爆粗，又鍾意爆肚，盤菜淡淡定話唔擔心：「我相信我應付到，我清楚佢，因為我爸爸就係佢。」

阿澤同盤菜已經係第二次合作，過去與阿澤合作嘅女星都會爆紅，好似梁洛施同鄧麗欣都曾獲影后殊榮，盤菜話自己都好期待：「我已經準備好，練好功夫轉頭就起飛腳。」阿澤笑住答：「咁好正常，我都出名反骨，你有冇睇《蘋果》？」盤菜起初講笑話喺阿澤身上學識周圍鬧人，之後認真回答﹕「其實佢好提攜後輩，我做得唔好會照直講，等我唔使撞板。」阿澤爆盤菜人少時候好謙卑，人多時即駁嘴，笑稱：「人多就要面，好正常。」

講番「毛台劇」，阿澤同盤菜都有做過服務行業，自己亦做過麻煩客人，所以對演出有信心。盤菜話：「以前喺馬會做電話投注，開閘前落唔切飛就會被人問候......咁我都明，成副身家性命財產喺我身上，我都試過落錯飛，幫人蝕錢。但情有可願㗎，覆飛時已經落錯，佢又話啱，但公司政策，責任就喺客人身上，自己都要聽清楚㗎嘛，我都知我又一定畀人鬧啦，哈。」

阿澤年輕時亦曾喺香港一間高級酒店嘅餐廳做waiter，遇見嘅麻煩客唔多，但自己就曾經狠狠地鬧過一個waiter。事源佢帶一位外國朋友去一間高級扒房食飯，對方對洋蔥敏感，waiter承諾一粒洋蔥都唔會加，但最後成碟洋蔥圈山咁高，阿澤話：「waiter都問『點解咁㗎』，呢句係服務員最出名嘅卸膊對白。我話『我識你老細，又識經理，我唔篤你背脊，但你呢一分鐘失去我，呢世唔會再嚟』。佢喊，我由心覺得佢係好好嘅waiter，但老婆就憎到我死，因為我發誓唔再去，佢又好鍾意嗰間餐廳，搞到幾年冇得食，後來偷偷同朋友去，仲話『我老公嘅嘢唔關我事』。」

杜汶澤
化妝﹕Connie Lai
髮型: Milk Chan @ Xenter

精選娛聞，喺晒《娛果》
http://fb.com/appledailyent