【兩年前大龍鳳】99支:18支 勝利者吳若希重提Alex不忠事件
吳若希Alex背叛何兆鴻
吳若希復出,依家忙於谷派台歌《為何你要背叛我》,首歌講兩人感情之間需要坦承而做到互相信任。聰明如佢,自然知道要點sell歌。
第一日,吳若希擺老公上枱,講生仔,仲話試咗成個月都未得,因為「老公唔勤力」,冇計。(新聞連結: https://bit.ly/2Oc779S )
第二日,吳若希都係擺老公上枱,自爆同老公仲係拍緊拖嗰時,發現對方感情上背叛自己,當刻成個人好似癲咗咁:「我記得係拍緊嘢,喺一廠出面不停打電話,因為對段感情越認真,就越對背叛嘅事上心。」(新聞連結: https://bit.ly/2DC3hCQ )
《為何你要背叛我》,首歌係講背叛,吳若希表示感覺似曾相識,有種撕心裂肺嘅感覺,佢話老公曾讓佢有呢種心痛,但未至於背叛:「嗰時某報記者話老公追求我時,情人節送花俾其他人,又有送花俾我,但對方有99支,我只得18支,之後我有問番佢點解,但男人都係避而不談。」
吳若希話,佢以前會嬲,但依家就覺好笑,老公仲叫佢放心,以後送花一定多過99支,依家每年送101支,呢件事成兩夫妻之間尷尬又搞笑嘅事。
其實吳若希憶述嘅呢件事,只係兩年前左右,當時仲未係老公嘅Alex,在送花事件曝光之後,喺fb發聲明,向吳若希「剖心」同公開道歉。依家事件中另一女主角都嫁咗人生埋B,大家都有個新開始啦。
已為人妻,亦為人母,吳若希話依家個心唔會因為呢件事唔舒服,因為心中最高地位嘅,係個女,仲已經幫囡囡申請學前班,但暫時未有學校回覆,若冇心儀學校,就會俾阿女報讀澳門嘅國際學校。何以不考慮香港嘅國際學校呢?吳若希話:「太貴學費,我冇錢,又冇買債券。」