正所謂「三個臭皮匠，勝過一個諸葛亮」，究竟創業打江山，同知己友好合作好唔好呢？《WebWorkerDaily》就有篇文章列出咗同朋友合作搞生意嘅5大隱憂：
1.朋友未必做你要佢做嘅事；
2.朋友未必知佢可以做啲乜，但又會將佢嘅存在價值自我膨脹；
3.朋友可能會要求自由度，但陌生人就唔會；
4.朋友未必夠外人勤力；
5.朋友未必聽你支笛。
網友JoshP似乎唔多同意呢個講法，佢喺討論區度話：「我同朋友夾份做生意已經超過一年，一直都相安無事。我覺得同朋友合作最緊要係溝通，先了解雙方嘅立場，就可以避免發生不愉快事件啦！」Marsello亦認同，「只要大家好好溝通，發揮彼此所長、互補不足，同老友拍住上搵食，自然可以事半功倍。」
不過，正所謂「商場無父子」，Bill就認為無論幾好嘅朋友，都要小心利益問題：「好朋友能夠同時成為生意上嘅合作夥伴當然最好，但無論雙方關係有幾好，一涉及利益問題都要君真啲，以免日後傷和氣。所以寧願先小人後君子，一遇到同合約或錢銀有關嘅文件，都要暫時放低大家嘅朋友身份，詳細睇清楚所有文件內容，好過他日因財失義，不單冇咗個朋友，甚至要對簿公堂。」