咪以為有咗粵港澳大灣區，特區政府就唔使再理「一帶一路」，只係無咗前特首梁振英無限地狂loop，令「一帶一路」唔再似689時代咁似足「催眠咒」啫！

特區政府有個高官團，聽日就因為「一帶一路」問題出發到北京，同國家發改委同國務院港澳辦，喺周二（12日）舉行首次「一帶一路」聯席會議，討論香港參與嘅策略方向、年度工作重點同埋即將推動嘅措施，會代特區政府出席嘅包括律政司司長鄭若驊、商經局局長邱騰華、政制局長聶德權、財庫局副局長陳浩濂同其他政府代表等。而鄭若驊之外，所有官員同代表周二晚就返港。

至於鄭若驊點解唔使跟大隊返港？皆因佢之後至16日會去英國倫敦訪問，介紹香港喺國際法律同爭議解決服務嘅最新發展等，期間會同英國政府高層官員、國會跨黨派中國事務小組成員等會面，同時更會出席「亞洲之家」嘅圓桌論壇，討論香港作為「一帶一路」嘅法律同交易樞紐。