「宇宙巨G.E.M.」鄧紫棋自爆曾經喺夢境中，夢到舊愛林宥嘉（Yoga）與女友丁文琪，但具體內容就唔係太記得，而記者問佢會否邀請Yoga睇台北小巨蛋演唱會，佢又唔介意前度捧場云云。

今晚Yoga就喺網上向丁文琪，發表單純而直接告白，正式公告戀情，Yoga大讚女友：「因為你有一顆發自內心的笑，而我一步步回到這樣的步調，就越來越珍惜這樣的生活……因為喜歡和你一起成為真實的人，喜歡用真心面對世界。」

與此同時，Yoga又若有所指咁話：「一起看了許多矯情的，看到最後無感了，矯情的還是一樣；曾經在絕望的時候也想過；遭受過怎樣惡毒的對待，就加倍奉還.....」

喺Yoga發表愛的宣言冇幾耐，G.E.M.又咁啱得咁橋，即刻喺facebook貼咗張同林俊傑合照，並寫咗句與林俊傑合唱嘅《手心薔薇》歌詞：「手心的薔薇，刺傷而不自覺！」哇﹗喺呢個敏感時候寫句咁嘅嘢，難免會令人有無限聯想嘅，當然G.E.M.粉絲繼續支持偶像，同佢講聲加油啦﹗